Rock festival jem gagauzça 2010:Dps Tat nd webEewcoml g.4 68
Kirez ayın (iyün) 12-dä Gagauziyanın kultura yaşamasında eni bir basamak alındı – gagauzların hem Gagauziyanın istoriyasında seftä Rock muzıkasının “JEM GAGAUZÇA – 2010” adlı rock festivali oldu.
Belliki festival oldu Çadır kasabasında, neredä bulunêr Gagauziyanın anılmış rock grupası “Çayır” hem yaşêêr bu grupanın öndercisi Mihail KULEV.
Rock muzıkası hem festivalin hazırlanması için Mihail KULEV ölä dedi: “Ani bölä bir muzıka dünnedä var, sanêrız, ani sadä gagauz gençleri hem orta yaşlı insannar bilerlär. Kalanı bilmeer hem, annamadıkları için, onu şeytan muzıkası sayêrlar. Ama bu diil ölä. Bu muzıka da, öbür muzıkalar gibi hem nicä hepsicii bu dünneydä, Allahtan. Biz çok erlerdä rock festivallerinä katıldık: Moldovada, Ukraynada, Rusiyada, Türkiyedä, Golandiyada, Başkurdistanda, Biyazrusiyada. Ama düşündük, ani sıra geldi artık biz da ölä bir festival hazırlayalım. Büük zorluklarlan, ama becerdik. Festivalä altı devlettän 30 rock muzıkasını çalan insan katıldı. Gözäl oldu!”
Demää ani gözäl – bu bişeycik dememää. Festival en üüsek uurda geçti. Bakmadaan ona, ani festivaldä er payedilmedi, muzıkantlar, ani var bir laf, ter-su içindä kalıp, biri-birlerini ustalıkta geçmää savaşardılar. Yarışmanın sonu yoktu. Jürinin erinä da zalda bulunan siiredicilerin şamar düülmeleri nota koyardılar.
Birkaç laf isteeriz festivalin adı için da sölemää. Rock muzıkasında var ölä termin “JEM muzıkası”. Gagauzçaya çevirdiinän: karma-karışık. (JEM halizdän bir tatlılık nicä povidla. Yaparkana onu karıştırêrlar türlü meevaları: şefteli, alma, kirez, zerzeli, erik h.b.) Burada da oldu gagauzça jem – “JEM GAGAUZÇA – 2010”.
Söz gelişi, bu festivaldä, başka türkülerin arasında Çadır kasabasının kultura Evinin sţenasından halizdän gagauzça rock türküleri da çalındı. Belli ki çaldı onnarı “Çayır” rock grupası.
İyi yol sana, “JEM GAGAUZÇA – 2010”!